MENUDONG PANG KASAL

Hindi ko alam kung pano ko naluto to.

Eto ata yung panagalawang beses na nakapagluto ako ng menudong lasang pang kasal o pang piyesta. Kanina nagluto ulit ako nyan. Hindi na ganon kasarap.


Niluto ko to para sa krismas party ng kumpanya e. Potluck e. Ako nagmaganda, nagpresentang magluto ng menudo. Nagpabili ako sa tatay ko ng rekado.

Baboy (sabihin mo nalang sa tindera, yung pang menudo, bibigayn ka na ng atay nun)
Toyo
Kalamansi
Bawang
Paminta

Yung proportion nyan ng pagkakababad e tatlong kilong baboy, 14 na kalamansi, toyo (mga 1 1/2 cup) or tantsahin mo nalang (okay na yung mabababad lang yung baboy sa toyo, wag naman yung nagsiswimming sa soysauce, parang yung tinuro ko sa tinoyoang baboy) tas isang ulo ng bawang tska paminta. Babad mo ng mga 6 na oras. Wag mong isama yung atay okay

Pagkatapos nun, pakuluan mo yung baboy, maglagay ka ng konting tubig para di matapang yung lasa ng toyo. Patuyuin mo. Matatantsa mong pang gisa na sya pag nagmamantika na yung baboy. (Pag patuyo na, me mantika ng lumulutang sa ibabaw). Hanguin at palamigin

Maghanda ka ulit ng

Atsuete
Bawang
Sibuyas
Bellpepper
Patatas
Carrots
Paminta
Asin

Ang ginawa ko muna, naglagay ako ng konting mantika sa isang pan, tas nilagay ko yung carrots at patatas. Ayoko kasi ng lasog lasog yung gulay ko. Pinapawis ko muna yung gulay. Tas tinabi ko. Pero kundi ka masyadong maselan, isama mo nalang yung gulay after mong igisa yung baboy.

Maginit ka na ng mantika, tas prito mo yung atsuete. After kumulay sa mantika, tanggalin mo yung buto, tas igisa mo na yun sibuyas at bawang. Tas yung baboy (wala munag sauce nung pinagbabaran). Tas yung atay. Pakuluin ng mga limang minuto. Tas lagay mo na yung gulay kung ayaw mong sundi yung tinuro ko kanina. Ikaw na mag adjust ng lasa.

Lahat naman ng kasamahan ko natuwa sa luto ko. Sabi nga nung isa,parang menudong pang kasal yan ah!
Siguro nga dahil sa pressure kaya masarap tong menudo na to pero eto lang talaga ang naiisipkong dahilan kung bakit flop ang luto kong menudo kanina:
1. Napagtanto ko, siguro nasa karne yan. Ang ginamit ko kasi kanina yung porkchop. Ang ginamit ko diyan, kasim. Ewan ko kung tama yung hunch ko.
2. Tska yung pagkakababad nadin siguro. Dapat konting kalamansi lang. Kung isang kilong baboy, mga 3 kalamansi lang. Tas saktong toyo, tandaan, hindi dapat lumulutang sa toyo yung baboy.
3. O kaya dahil sa tensyon ng malaman kong 800 yung nagastos ng tatay ko at dapat kong singilin ng tig 160 ang mga kasamahan ko. Ewan.

Nga pala, depende sa inyo kung gusto nyo maglagay ng tomato sauce.

BINAGOONGANG BABOY/BICOL EXPRESS

Madami na kong naluto at nakunan ng litrato at nakatambak sya sa PC namin. Mahirap magkasakit.

Eto ang version ko ng binagoongang baboy na me pagka Bicol Express.

Ang binagoongang baboy kasi alang gata, ang Bicol express naman walang bagoong. Ang problema ko kasi sa binagoongang baboy masyadong maalat. Makati sa dila sabi nga ng pinsan ko.

Pareho lang silang ginigisa, sa binagoongan pwede kang maglagay ng talong. Yung Bicol express naman, me natikman ako na nilagyan ng sigarilyas. Pampacounteract siguro sa anghang nung sili.

Madali lang to, ang pinaka burden na siguro e yung paghati at pagtanggal ng buto ng sili. Mahapdi sya sa kamay. Gloves lang ata katapat nun para di mo maramdaman.

Sangkap

Bawang
Sibuyas
Baboy
Sili (yung siling haba, yung panigang)
Gata
Bagoong
Paminta

Pakuluan mo muna ng konti yung baboy. Pag malambot na at medyo ma brown na, hanguin mo, igisa yung bawang at sibuyas,tapos yung baboy, tapos yung bagoong. Lagyan ng konting tubig. (mga 1/4 cup) tas yung sili na tas yung gata na. Timplahan mo ayon sa panlasa.

Usapang gata, kundi instant gamit mo, una mong ilagay yung pangalawang banlaw, huli yung kakang gata para lumapot.

CHOCOLATE REVEL BARS

HINDI KO ALAM MATAGAL NA KONG NAG KE CRAVE SA REVEL BAR NG JD BAKESHOP SA ILOILO.

ETONG RECIPE NA TO E HINDI KO MAI SHE SHARE. MAGAGALIT SI CHEF AILEEN NG MY FAVORITE RECIPES. HANAPIN SA WMN.PH ANG MAGIC SPELL.

BALIW NA BABOY (TINOYOANG BABOY)

Sa tita kong malayo natutunan lutuin tong tinoyoang baboy kasi laging yan yung pinapabaon nyang ulam sa pinsan kong kasama ko sa boarding house nung college. Pero hindi ko padin magaya yung tinoyoang sinasabi nya. Nun pala, ang tinoyoan, aprang adobo o menudo na galing sa handaaan na habang tumatagal at paulit ulit na iniinit e sumasarap.

Simple lang to,parang adobo na imbes na suka ang pangasim e kalamansi ang gagamitin. Me exact measurement daw dito sabi ng tita ko, pero ako hindi ko padin minemeasure ang mga ginagamit ko. Sabi nya kasi non "lasahan mo yung timpla mo, tikman mo!"


Hindi sya dapat sobrang asim na kasing lasa na ng bistek na baboy at hindi masaydong maalat na kasing lasa na ng adobo. Eto yung mga kailangan

Isang kilong baboy (wag buto buto, sabihin mo yung pang adobo)
Bawang
Sibuyas
6 na medium size na Kamatis
5 Calamansi
Mga 1/2 cup na toyo (basta di nalulunod sa toyo yung baboy kung ayaw mong umalat luto mo)
Dahon ng laurel
Asin
Paminta

Ibabad mo muna yung baboy sa sibuyas, bawang, dahon ng laurel, toyo, kalamansi , kamatis, konting asin at paminta. overnight ko syang binababad. pagkatapos papakuluan mo lang sya, wag masyadong malakas yung apoy, habang kumukulo at kung medyo natutuyuan na sya, lagyan nyo ng konting tubig. pag medyo malambot na yung karne at medyo konting sarsa nalang ang natitira, hanguin nyo yung baboy. Tas igisa nyo ulit yung baboy sa sibuyas at bawang. tas ilagay mo ulit yung sarsa. Yun na!

Sabi nga ng tita ko, tikman mo yung timpla mo para matantsa mo kung ano kulang at kung ano magiging lasa ng luto mo. basta tandaan mo, hindi sya dapat sobrang asim na kasing lasa na ng bistek na baboy at hindi masaydong maalat na kasing lasa na ng adobo.

Habang naiimbak, sumasarap. Pero sa ref mo ilagay ha.

GINISANG MUNGGO

Hindi ko talaga nagustuhan ang munggo kahit kelan. Nung bata ako, pag eto yung bubungad sakin pag bubuksan ko yung kaldero, nabubuset ako at nawawalan ng gana kumain. Wala kasing dating sakin yung lasa. Parang dumaan lang sa lalamunan ko. Tska madalas kasi pangsahog ng lola ko hebe at chicharon. E ayoko pa naman ng chicharon na hindi na malutong, kaya badtrip talaga ko pag eto ang ulam.

Hanggang sa pagtanda ko dinala ko yun, pag me ulam sa carinderia, X kagad ang ginisang munggo sa listahan. Magbubukas nalang ako ng sardinas wag mo lang ako pakainin ng munggo.


Hanggang sa isang araw, kumain kami sa Clark ng pamilya ko. Umorder ng ginisang munggo ang tatay ko. Sakin okay lang, me inorder naman akong sisig kaya di ako apektado.

Pero nung nakita ko yung munggo, natakam ako. Me celery kasi. E kahit anong ulam pa naman na me celery e gusto ko. Nagiiba kasi yung lasa at bumabango yung pagkain, nakakatakam talaga.

Kaya simula nung araw na yun, nakasama na sa listahan ng mga lutuin ko ang ginisang munggo. Karaniwan, ang sahog nyan e yung natirang tinapa o kaya yung hebe. Pero para sa akin, okay yung baboy. pag tinapa kasi naglalasang tinapa yung gulay, di mo na malasahan yung munggo. Karaniwan din na nilalagyan sya ng dahon ng malunggay, o kaya dahon ng sili.

Tska yung bersyon ko ng ginisang munggo, me ampalaya. Me diabetes kasi tatay ko e. Masarap naman kahit papano. Pero kung ikaw yung tipong di talaga kumakain ng ampalaya, kahit wala non masarap na.

Sangkap:

Bawang
Sibuyas
Baboy
Munggo
Tubig
Ampalaya
Celery
Asin
Paminta

Huhugasan ko muna yung mungggo tas binababad ko ng mga isang oras sa tubig, tas pakukuluan ko muna yun. Masyado kasing matagal bago yun lumambot e. Pagkamalambot na, igisa mo na yung bawang at sibuyas tas isunod mo na yung baboy, pag mapula na yung baboy, lagay mo na yung pinakuluan mong munggo, unang kulo lang, lagay mo na yung ampalaya, pagkatapos ng mga sampung minuto patayin mo na ang apoy at lagay mo na yung celery. Timpalahan mo ng asin at paminta ayon sa iyong panlasa.

Okay sya sa pritong isda + kanin.

SUWAM NA MAIS

Siguro nagtataka kayo kung ano ang suwam na mais. Tinayp ko ang "ginulay na mais recipe" sa mga search engine at iilan lang ang lumabas. sabi pa nga, Ibig mo bang sabihin ay: gulay na mais

Suwam na mais o ginulay na mais o gulay na mais man e iisa lang ang tinutukoy nyo.

Isa ang suwam na mais na lagi kong niluluto sa ngayon kasi yung kapitbahay namin na mini talipapa e laging me mais na tinitinda. Kung nagtataka kayo, hindi ito yung talagang mais na nilaga na, yung ginagawang suwam e yung hilaw pa. Ang ginagawa nila diyan, tinatanggal nila yung butil ng mais sa busal. (Okay, busal yung corn husk kung naguuguluhan ka). Yung iba, tinatapyas ng kutsilyo yun, ako naman, kutsara gamit ko. Mahirap i explain kung pano, kung pwede ko lang i vedio e binidyo ko na sana.

Pero hindi ko tinatanggal sa busal yung butil. Ang gulo ko ba?

Yung version ko (actually version ng lola ko) e ginagadgad namin yung mais. Gamitin mo lang yung malaking butas ng panggadgad. tas ayun na. Nakakapagod lang at medyo messy kasi tatalsik ng onti yung mais pero mas luto sya at mas malasa.

Iba ibang dahon ang pwede mong ilagay diyan. malunggay, dahon ng sili, dahon ng ampalaya o talbos ng kalabasa ang iilan sa pwede mong ilagay. Okay na yung dahon ng sili, madali lang hanapin.

Eto na yung sangkap:

Bawang
Sibuyas
Baboy (pang sahog)
Mais
Tubig
Dahon
Asin
Paminta

Hindi lang baboy pwede mong pangsahog, pwede din yung hebe. (yung maliit na hipon na nabibili sa tindahan na parang tuyong mini hipon). ang ginagawa ko, papakuluan ko muna yung baboy sa konting tubig apra di matigas tas hahanguin ko tas igigisa ko na yung bawang at sibuyas tas kasunod na yung baboy. Tas susunod na yung mais, lagyan mo ng tubig, pakuluan mo, tas lagyan mo ng asin at paminta ayon sa iyong panlasa, pakuluin mo pa ng konti. (mga 20-30 minutos lang siguro yung boiling time ko sa mais all in all). Patayin mo tas ilagay mo na yung dahon, yun na!

Sabi nga pala tatay ko mukha daw panis yung niluto ko sa litrato, pasensya na, bagong kulo kasi yan kaya me bula bula. Sa susunod alam ko na.

Okay tong ulamin kasabay ng pritong porkchop. Tas me Coke. Pero pwede na syang kainin ng ganyan na mismo!

Pesang Tilapya

Kadalasan, dalag talaga yung ginagawang pesa. Kaso hindi ko gamay lutuin yun at mahirap hanapin sa palengke at mas mura ang tilapya kung tutuusin. Tska mahilig talaga ko sa tilapya. bukod sa mura na, hindi pa masyadong matinik. Tsaka sa sarili kong pananaw, kahit magtagal sa ref yung tilapya (mga isang linggo siguro), okay pa yung lasa nya pag pinrito. (Pag prito lang ha!) Kung magluluto kayo ng isda na me sabaw, bilin nyo lang sya sa araw na lulutuin nyo sya. Dapat sariwa talaga. Kasi kung hindi, madidismaya ka sa lasa at maangong amoy nung niluto mo. oo nga, dapat naman talaga laging sariwa yung niluluto mo, pero minsan di mo din kasi maiiwasang mag imbak ng lutuing ulam sa ref mo.

Hindi ko na nakasanayang samahan ng miso ang pesa ko. Impluwensya daw ng mga intsik ang tambalang pesang isda at ginisang miso bilang sawsawan, pero para sa akin, kalamansi at patis lang okay na.

Ano pang kinaiba ng Pesa ko sa tradisyonal na pesa?

Yung tradisyonal na pesa, hugas bigas yung ginagamit na pangsabaw, yung akin, tubig lang. Tska ang tunay na pesa, ginigisa muna yung isda. Yung akin kasi, sinasalang ko at pinapakuluan sabay sabay yung isda, sibuyas, asin at luya. (gawaing tamad ata to) tska ko hahanguin muna yung isda (malalaman mo naman na pag luto na yun) kasi baka malasog. Tas hahayaan kong kumulo ng matagal tagal yung sabaw para lumasa lalo yung luya tska para mawala yung lansa. tas isasahog ko na yung patatas.

Eto na muna nga yung mga isinahog ko.

Sibuyas
Luya
Tilapya
Tubig
Patatas
Pechay Baguio (pwede kahit anong pechay na available)
Asin
Paminta

Ayun na nga, nakasulat na sa taas kung pano ko niluto yung pesa ko. pero ayoko naman kayong turuan ng mali. Pwede nyong subukan yung gawi ko, o pwede nyo ding igisa na muna yung isda. Siguro kung dalag man yung gagamitin ko, malamang igigisa ko muna din yun kasi malansa talaga sya.

Panalo to kasama ang kanin. Pero pwede ring kainin ng ganyan na mismo kung nagpapapayat ka kasi masarap papakin ang tilapya.

Hanggang sa muli.

PWEDE!

Yan ang sambit ng kapatid ko habang kinakain nya to. hindi naman talaga ko magluluto kasi dinefrost ko na yung Tilapia na lulutuin ko para sa hapunan kaso yung kapatid kong makulit e inutusan akong magluto dahil gigising na daw maya maya ang aming tatay. At dahil nga bukas palang ako mamalengke, at masyado pang maaga para magluto ng hapunan (bandang alas dos ng hapon ata yun) e napilitan akong mag luto ng kung ano mang makita kong nakabuyangyang sa ref namin.

Yung sinangag na to e pakana ng aking ama. Madalas kasi pritong isda nalang ang makikita mo sa ref namin. Mga 3 araw syang naiimbak don. Walang pumapansin. Madalas galunggong, tilapya at tamban ang makikita mo. At dahil nagsasawa din ang tatay ko na i microwave lagi ang pritong isda (na nakakaum naman talaga lalo na't kung paulit ulit mong inuulam) e ginawang pangsahog ng tatay ko sa sinangag nya ang tira naming pritong isda.

Siguro naiisip mo na pwede namang i-Sarciado o Tahore o kung ano man ang tawag nyo sa ginisang kamatis tas ibabahog sa pritong isda. Oo pwede naman. Kaso minsan mahal ang kamatis at natataong bawang at sibuyas lang ang nasa ref mo. O kaya sa lagay ko, minsan tamad ako maghiwa ng kamatis. lalo na pag maliliit na piraso.

Convenient tong gawin kung meron kang tirang kaning lamig at tirang pritong isda. Eto lang yung sahog nyan.

Bawang
Sibuyas
Luya
Kaning lamig
Isda
Asin
Paminta

Igisa mo lang yung luya, bawang at sibuyas tas yung isda tas yung kanin na. Ganun lang. Bantayan mo na yung luya at bawang habang ginigisa mo, kasi pag nasunog yun, gumagara yung lasa.

Kung ala kayong luya, wag mo ng subukan to. Hindi ko rin kasi alam kung masasabi mo ring Pwede! na tong sinangag na to kasi yung luya din yung nagbibigay ng kakaibang lasa sa kanya. Tska syempre isda parin yan, kahit papano me lansa padin yan kahit naprito mo na.

Pesang tilapya naman bukas.

Another pinoy food blog?

First,this blog is just a product of 3% boredom and 97% inspiration from the cookbook that I saw in the bookstore. Second, don't expect me to explain some of my recipes in English, jologs ako, hindi ako alta sosyodad, kaya eto na siguro ang una't huling entry ko na English, na nahaluan pa ng tagalog. Third, I want to communicate with my fellow class that's why ill speak in Tagalog, Fourth I'm a Filipino that's why my entries will be in Thighalogue. Fifth, some of my entries that will be featured here are our random ulam for that day, so don't expect it to be served ala fine dining (unless there's an occassion) Sixth, some of my recipes are the usual ulam you'll see in carinderias, I just have my own way of cooking it and maybe some variations. and Seventh, dont expect me to measure my ingredients, I don't live by sukat principle (except for desserts and pastries) Namulat ako ng pa tantsa tantsa at walang sinusunod na measurements. I just season what I cook according to my taste.

and why the name thirdworldkitchen?
Ive seen few pinoy food blogs around, thanks to my father who always scrutinize what Im serving him. He'll say "anak bat ganon anak bat ganyan anak bat walang" and the list goes on and on. I want to find the best way to improve my cooking skills, but some pinoy recipe blogs offer me with wide variations. Fusion na sya ng kung ano anong cuisine.

As my fifth condition implies, the recipes that I will feature are some of our ulam for that day. we buy pang rekado from talipapa, like any normal Filipino does. Not from groceries or wet section of supermarkets. To make the long story short, Ill feature the common viands, or the viand that is also cooked by your neighbor, the usual viand that you'll find in the hapagkainan of every Pinoy household. I cook the Pinoy way. I eat the Pinoy way.